افغان پوسټ د کارګو چوپړتیاوو د رامنځته کولو په موخه پنځه اړخیز هوکړه لیک لاسلیک کړ؛

نن چهار شنبه، ۱۴۰۰ د وري ۱۸مه، د کارګو چوپړتیاوو رامنځته کولو په موخه د افغان پوسټ دولتي شرکت، سوداګرۍ وزارت، د ملکي هوانوردۍ ادارې، د افغانستان د سوداګرۍ او پانګونې خونې او د افغانستان د خونو فډراسیون تر منځ، په چارو اداره کې یو هوکړه لیک لاسلیک شو، چې له مخې به یې له افغان پوسټ دولتي شرکت سره د کورنیو او نړیوالو کارګو چوپړتیاوو او د هوايي دهلیز د آسانتیاوو برابرولو، د فضايي مواصلاتو او لېږدوونکو لارو ودې، له نورو هیوادونو سره د افغانستان د سوداګریزې پراختیا او د افغانستان د عایداتي سرچینو د پیاوړتیا په پار پنځه اړخیزه همکاري رامنځته کېږي.

دغه هوکړه لیک به زمینه برابره کړي تر څو افغانستان په دولتي کچه د کارګو له چوپړتیاوو برخمن شي او سوداګر وکولای شي له نړیوال معیار سره سم، په کم لګښت او ټاکلې موده کې خپل مالونه ولېږدوي.